فحتة الشتـــــاء

الزمن: يوم الجو فيه ناوى يديها شتا
الأبطال: يحيى وواحد دفليوبر اسمه تامر
الفحته:
يحيى: كنت واقف فى الشباك والجو غيوم وضلم مره واحده من السحاب فرجعت اقول للناس شكل الجوه هيشتى النهارده
تامر: اه فعلا دا هيشت أم الـ
(Hysht M L).

تمت

فحتة البلوتوث

المكان : الشغل
الزمان: من 5 دقائق
الحدث:دخل شخص يسأل عن هندومه ومعاه دكتور وعرفنا الدكتور من لبسه وبعد ما مشيوا
ماهر:دا دكتور اسنان
نهاد: وانت عرفت منين
ماهر : من إبتكاره
نهاد: لا دا كان مشغل BlueTooth

فحتة التليفون

المكان: وائل فى الشغل وأحمد الشربينى فى الشغل
الحدث:احمد اتصل بوائل يسألة مفيس فحته كدا على السريع
وائل :متأكد
أحمد: بجد عاوز وحده على السريع
وائل : فحته على السريع ولا الدائرى
أحمد : اقفل يا وائل

فحتة القبطان

المكان: العربية
الزمان : إمبارح بالليل وإحنا مروحين
شراقى: هنروح منين
طلبه: من عند القطان
شراقى: منين
طلبه: القطاااان
شراقى: قط وقط يعنى(طبعا شراقى كن بيفحط ولكن الفاجأه)
وائل: لا يواد القطان بتع السفينة
وعم التهييس على اجميع والكل قعد يضرب ف وائل

فحتة البحيرة

المكان: السيارة
الحدث: كنا بنتكلم عن السيول الى فى جدة
وائل: فى بحيرة هناك لى الصرف
شراقى: البحيرة دى عذبة
وائل: لأ متجوزة
رد الفعل: شراقى مخه وقف لى فتره غير ان كان فى ناس هتنط من السيارة

فحتة الشاى

الحدث : بزور عمتى
عمتى : تشرب شاى يا اسلام؟
انا : ياريت
عمتى : تحبه فتله وللا كشرى
انا : ياريت فتله عشان عاوز اخس !

فحتة عن لســان سيــد البــنا \:C

المكان: شركة اى تيك
الزمان: من زمان اوى قبل الفحتات من 3 سنين
الأبطال: السيد ورمضان واصدقاء
الفحتة : السيد ورمضان بيتكلموا وهما قاعدين على جهاز كمبيوتر
رمضان: كان بيتكلم فى موضوع وكان متضايق
السيد: بينصحه بيقوله لا يا عم الموضوع دا لازم (تعديــــه)
صاحبهم رما ودانـه فى الاخر: لا عالسى(C) يا جماعه مش عالدى (D)

تمـــت

موسيقى البرامج

الزمان:اول الاسبوع الصبح
المكان : اتوبيس السوبر جيت
الأبطال : يحيى ، عبد الفتاح
الفحته : كنا عمالين نعمل موسيقى للبرامج بتاعت زمان الشيخ اشعراوى واخترنا لك ونادى السنيما
يحيى : بعمل موسيقة برنامج همسة عتاب
عبد الفتاح بسرعه : دا برنامج همسة عتـــاب
يحيى : اه عتــاب إسماعيــــل

تمـــت

مع الإعتذار للأستاذ(ايهاب اسماعيل)

جرهام بيل

المكان: الشركة
الزمان: لسه امبارح
المناسبة: حامد بيشرح Voip لعصام وسمير وأحمد شبانة وأحمد الدرعة

الفحتة:
حامد: أيام جرهام بيل ماكانش فيه حاجة اسمها Calling Signaling يعني علشان أكلمك على التليفون لازم نتفق على معاد معين أكلمك فيه ترفع السماعة لأن التليفون مش هيعرف إن فيه حد بيتصل.
عصام يقترح إن المتصل يرن على جرهام بيل الأول قبل مايتصل

فحتة الفراخ

الحدث : كنت بتكلم مع واحد زميلى على منتجات الشركة بتاعتنا اللى احنا بنوزعها
أنا : ماشيه معاك ياعم مياه أكوافينا وفراخ دو ॥ الا عمرك جربت تدوق الفراخ الدو دى؟
هو : لا جربت الفراخ الساديا
أنا : ساديا وللا عبد الحليم؟
ملحوظة : الفراخ الدو والساديا فراخ مغلفة ومجمده :)

فحتة فى الطريق

الزمان: من يومين
المكان: فى العربية
الحدث: كنا بندور على مكان نشترى منه موبايل
عمرو بدوى: ايه دا مستوصف الجافل
وائل: ودا هيفتح امتى
شراقى كنت هاولع فيهم الاتنين

فحته رقم 35 فحت على نفسه

المكان: محطة مصر
الزمان: 2 ديسمبر , 2009
المناسبة: أحدهم متوجه إلى المنصوره
الفحته:
اشترى التذكره ( درجه أولى قطار المنصوره موعد 7:25 صباحاً)
ثم توجه إلى الرصيف
سأل - فين قطر المنصوره
أحد العاملين بالمحطه مشيراً للقطار - أهوه
ركب أخينا القطار و انتظر حتى الثامنة إلا خمس دقائق
فسأل أحدهم - هو مش ميعاده 7:25؟
فأجاب الرجل ببساطه - لأ 8 وده قطر أسوان على فكره
بهت أخينا وقال بسرعه - طيب أنا هنزل اشرب قهوه بقى على ما يطلع

فحتة الشقة

المكان: الشقة فى السعودية
الحدث: بنتكلم عادى
طلبه:بقول لى وائل انا مقعدك معايا هنا شفقة
وائل: ايوة شفقة قضتين وصالة

نمسي

الزمان: من 5 دقايق
المكان: Messenger
المناسبة: أحمد محسن وحشني قلت أسلم عليه

الفحتة:
سمير: السلام عليكم. نحب نمسي
محسن: وعليكم السلام ورحمة الله وبركاته. نمسي ونرونالدو كمان

فحته رقم 32 - بلياردو

المكان: بيتزا فطومه
الزمان: 29 نوفمبر, 2009
المناسبة: بنتعشى على حساب حسام علشان اتغلب فى البلياردو
الفحته:
حسام (متألقاً)- ايه رأيكم نخلى جزء من خروجاتنا فيه حاجه خير
أحمد سمير - ازاى يعنى ؟؟
أحمد ابراهيم (رد سريع) - يعنى نروح نلعب بلياردو فى الجامع

فحته رقم 31 - الجمعه

المكان: كافيه
الزمان: 29 نوفمبر, 2009
المناسبة: جلسة تاريخ
الفحته:
حسام عبد الواحد - ما تيجوا نطلع اسكندريه يوم الجمعه
أحمد ابراهيم - أنا لسه بفكر علشان الجمعه بيبقى الماتش
إيهاب اسماعيل - الجمعه الجايه دى ؟؟
حسام عبد الواحد - آه الجمعه الجايه
إيهاب اسماعيل (بكل برود ) - الجمعه اللى بعدها سبت دى ؟؟؟

صمت

تهاييس فارس

من أكتر المواقف اللى ضحكت فيها ايام شغلى فى ايجبت نت وورك
فارس هادى بطبيعته ومش بتاع افيهات الا فيما نادرا
اول موقف كان مطلوب منه هو وسالم يشتغلوا ولأول مرة بالكنتيكو او الشير بوينت تقريبا
وفارس متعود يروح كل يوم الساعة 6
والساعة جت 8 وهو لسه على جهازة مروحش , فهيس مع نفسه
قال لأ لأ مش هينفع أنا هيست عالآخر , دى تهييسة آخر اليوم , أها
(على وزن اغنية دادادا)
تانى موقف كان وقت توزيع البروفيت شيرينج او توزيع الارباح وهو كان جاى السنه اللى قبلها فى نصها وكان البروفيت عبارة عن شهرين لكل موظف فمعنى كده انه مش هياخد الا شهر
فقال الشركة بتقولى بوس ايدك وش وضهر ان انا هديلك شهر
(على وزن اغنية ماريا بوس ايدك وش وضهر ان انا حبيتك شهر)
ويا صباح التهييس :D

فحتة الماوس

المكان: الشركة
الزمان: اليوم قبل صلاة الظهر
الحدث: ماهر بيتكلم على انه مش بيعرف يتكلم على النت كتير
ماهر: مرة وانا بكلم زوجتى بنتى قعدت تخبط بالماوس ومعرفتش اسمع حاجه منها فقولتلها سكتى البنت بدى اعرف شو بتقولى.
نهاد: مهوا انت لو فى بسه فى البيت مكنش حصل دا كله.
شراقى: أو ممكن تحطلها حته جبنه رومى وهى هتهدأ على طول

ماهر توقف عن الكلام لمدة دقيقة

فحتة الريال

المكان: فى الفندق
الزمان: من كام يوم كدا
الحدث : كان فى طلبات مطلوبه ومحمد نهاد هيحاسب.
نهاد راحل لماهر مستعجل
نهاد: أبى ريال
ماهر: ليه
نهاد:ابى ريال بس بسرعه.
ماهر: وانا ابى برشولونه حل عنى.

نهاد ضحك ضحكه صفراء وسابه ومشى

فحتة السمنة

المكان: موهبة أثناء الشغل
الزمان: من نص ساعة
الحدث : أنا كنت قاعد شغال وأتى محمد نهاد زميل لينا فى الشغل.
نهاد: شراقى انت عزيت.
شراقى: فى مين
نهاد: يعنى انت عزيت.
شراقى: لأ
نهاد: طيب عالسمنه هههههه.
شراقى : مسكت إزازة المية وكنت هأحدفه بيها بس مسكت نفسى.

فحتة المعروف

المكان:مطعم جاد
الزمان : النهارده وإحنا بنفطر أصل احنا كنا صايمين
الحدث : كنت انا ووائل وعباس ومحرم بناكل وبنتكلم على البلوج
عباس:انا دخلت على البلوج النهارد وقرأت كل الفحتات الى عليه
وائل : هوا انت الى (غير معروف ) الى كان بيعلق على الفحتات
عباس: أه انا وبكل فرحه
وائل وبكل استغراب: انت تقرب لعبده معروف
عباس وبكل دهشه: غور يلا
شراقى ومحرم وقوعوا على الارض من كتر الضحك
وعباس كان هيموت وائل

أكاد أجزم

المكان: في بلكونة الشركة
الزمان: صباحا
الحدث: محادثة شخصية بين فارس و سالم
الموقف: فارس و سالم يتجادلوا في معلومة معينة
سالم: أكاد أجزم يا فارس ان اللي في دماغي ده هو اللي صح
فارس: طب إزاي هتجزم بالجزمة يعني !!!!
سالم: يحاول تمالك نفسمه من الغيظ، ويدبدب بالجزمة في الأرض ويفر هربا من فارس.

فحتة الموقف

المكان: الشركه
الزمان: فى الحمام بعد الوضوء
الحدث: حوار عن موقف مصر والجزائر بعد ماتش السودان فى التصفية
وائل مش وائل عباس وبكل عصبية: أنا مش عاجبنى موقف مبارك مع الجزائر.
شراقى: ياابنى ليه بس كدا.
وائل : يبنى موقفه مش كويس
شراقى: خلاص ما دمت انت مصر شوفلك موقف تانى.

محرم وعباس كانوا هيولعوا فى.

فحتة البيض

المكان : موهبة للإبداع
الزمان : يوم الأحد
الحدث : تحاور عن عمليات تنظيف الاسنان والتبيض.
ماهر : انا هأعمل تبيض لأسنانى
شراقى : والدكتور هيجيبلك البيض منين.

وعم الصمت على المكان

فحته طفولى

الحدث : كنا فى رحلة وراجعين ومعانا أطفال وكنت مشغل الوكمان والسماعات على ودنى
طفلة بتسأل أختها الكبيرة ( قصدها على سلوك السماعات ) : هى دى بقى الأحبال الصوتية؟

فحتة الكوندور

المكان : دريم بارك
أنا : إكرامى ياللا عالكوندور؟
إكرامى : كوندور ولا تكن Window !!!

فحتـــــة البــــلوج

المكان: بيت واحد قريبى
الزمان: يوم خميس اجازه ليه
الوقت: كنا باليل الساعه 10
الحدث: بكلم قريبى عن البلوج بتاع الفحتات اللى بنسجل عليه ده
قريبى: مش فاهم انت بتتكلم عن ايه
يحيى: قلتله انت تعرف الاول ايه هو البلوج ؟
قريبى:قالى اه طبعا لما تكون مش عاوز تكلم حد على الماسنجر ممكن تعمله بلوج :S
رد الفعل: طبعا الرد الطبيعى بتعنا امسح رقمى ولا انت قريبى ولا اعرفك

أندومى

المكان: شقة واحد صاحبنا
الزمان: الساعه 2:30 باليل يوم ماتش مصر و الجزائر فى السودان
الحدث: شراقى بيتكلم على الشغل
شراقى: والله هندومة دا طلع واد جدع معايا النهارده وافقلى على الإذن.
وائل: هندومى دا انت ممكن تحط ميه عليه وتاكله.
عمرو بدوى و احمد محرم واحمد مصطفى وشراقى و طلبة (NO COMMENT)

فحتة المنظار

المكان: الجيش

الزمان: مش فارقة

الحدث: كنا بنتكلم (كالعادة في الجيش, مفيش ورانا حاجة غير الكلام), ودخل علينا عسكرى فلان تقيل على قلبنا

الصول محمد: عامل ايه يا فلان؟

فلان: الحمد لله, بس لما رحت العيادة قالولى انى لازم اعمل منظار

محمد عصام: يا بخت منظار وخفف !!

الصول محمد (وكأن محدش اتكلم): ربنا يشفيك يا بنى

محدش فهم أصلاً انا قصدى ايه !!!!

فحتة العربية

المكان: العربية
الزمان: كنا بالليل
الحدث: كنت انا ووائل وياسر وبنتكلم
وائل: ياسر دا اخويا الكبير بس عمرى ماشوفته بيضحك خالص دا حتى لو ضحك مش هاشوفه
ياسر: مستغرب
شراقى: ليه بس يا ابنى
وائل: اصله بيضحك لفوق فعمرى ما هاشوفه

طبعا عم الصمت على المكان وشراقى مقدرش يمسك نفسه من الضحك وياسر كان هيضرب وائل

فحتات الأماكن

الجروب فى إسكندرية
المكان : المعمورة
الحدث : دخلنا المعمورة البلاج ومشينا عالرمل كتير
وائل : هو إحنا كده وصلنا محطة الرمل؟

الجروب فى القاهرة
المكان : الحسين
الحدث : ماشيين فى شارع واسع نازل لتحت شوية متجهين للحسين
وائل : هو إحنا كده وصلنا نزلة السمان؟

ولا تستحدث من العدم

المكان: مدرسة الفردوس الإبتدائية (أو الإعدادية)
الزمان: أكيد مش هافتكر
المناسبة: حصة العلوم
الفحتة:

المدرسة: الطاقة لا تفنى ولا تستحدث من العدم
المدرسة تاني: يعني لو إنت تعبان جدا وخلاص مش قادر تتحرك وقاعد في البيت ولقيت حد هيقع من البلكونة مش هاتقوم تلحقه؟
المدرسة كمان: يبقى الطاقة لا تفني!
ملحوظة: كنا مقتنعين باللي بتقوله

فحـــــتة الإعتصــــــــام

المكان: غرفه العمل بالشركه
الأبطال : عبد الفتاح وشخص اخر (ديفلوبر)
الحدث:
الديفلوبر: لازم يا جماعه علشان اللى بتعمله الجزائر دى نعمل إعتصام
عبد الفتاح : بالظبط إعتصـــام وسمير

مع الإعتذار لكل من (محمد عصام ومحمد سمير)

تمت

فحتة الجرايــــد

المكان : واحنا قاعدين شغالين فى الشركه
الأوفيس بوى : يا جماعه مفيش حد هنا معاه جرايد
عبد الفتاح : لا محدش علشان الجريده لا تفيد

رد الفعل : ولا حد عبره وقمت اسجل الفحته

تمت

فحتة البلاى ستاشن 4

عمرو: انا هلعب بى ريل مدريد Real Madrid
وائل : وانا هلعب بريل بليير Real Player
رد الفعل : لم يستطيع عمرو النوم هذه الليله

فحتة البلاى ستاشن 3

الحدث : بنلعب ماتش بلاى ستاشن وفجأه الشاشه ازرقت وكل المشاهدين (العشرى - طلبه - عمرو - شراقى - احمد - احمد)
قالوا فى ايه ايه حصل
وائل : اكيد الإعلانات
المشاهدين : سكوت تام عم المكان
بعد وقت قصير انهار كل الشاهدين

فحتة البلاى ستاشن 2

عمرو : انا هلعب بي انتر (انترميلان)
وائل : وانا هلعب بى الشفت

فحتة البلاى ستاشن 1

المكان : شقة واحد صحبنا فى السعودية
الحدث : كنا بنلعب بلاى ستاشن

العشرى: انا ملعبتش كورة بلاى استيشن من سنتين
وائل : دا انت كدا ممكن يجيلك شد عضل

فحتة البنزينا فى السعودية

دخلين على البنزينا نمون فى السعوددية فى بنزين 91 و 95 بس
عمرو بدوى >> هو مفيش هنا بنزين 80 (زى مصر)
وائل >> لأ التنسيق هنا عالى

فحتة المدونة

هلا ياشاباب ليكم وحشه والله
فكره كويسه والله مدونة لى الفحت
بس بتدون (Download) على كام المدونة دي ;)

فحتة المستكه

فارس للعسال : يعنى ايه unmistaakable
العسال : يعنى الاكل مفيهوش مسكته :D

فحتة الصوت

سراج : وطوا صوتكم شوية يا جماعة الصوت بيرن فى المكان !
وائل : طب ما تفتح عليه !!

فحتة الاوراسكوم

عصام : فى مركز تدريب اسمه اوراسكوم ياريت تتصلوا بيه
اسلام : اوراسكوم من اوراسنا واحد ياعم الحج !!
اسلام مستدركا : معلش معلش اوراسكوم وفطايركم موجودين يا ريس :D

بنى آدم

المكان: مكتب سيرجو
الزمان: من كام يوم
المناسبة: مفيش مناسبة
الفحتة:
فارس: طب مش انت بنى آدم؟؟
سيرجو(بكل هدوء): لأ.
فارس (مستغربا): أمال؟؟!!!!
سيرجو: بنا سونك.
فارس ينهار ويترك المكتب مستغرباً

أبو نيه

المكان: فى الشغل
الزمان: 8 نوفمبر 2009
المناسبة: سؤال من خالد أثناء الذهاب للبريك
الفحتة:
خالد: انتوا عاملين أبونيه مع المطعم ده
سيرجو: أيوا عاملين أبو نيه وأم نيه وخالة نيه

فحته رقم 2 - ساندوتش فول

المكان : الصاله فى البيت
الزمان: 10 نوفمبر 2009
المناسبه: سؤال لماما هتتعشى إيه
الفحته :
ماما - هو البغل عنده دليفرى ( البغل محل سندوتشات فول )
أحمـد - ساعات ساعات ... بمزاجهم يعنى
ماما - وللا أقولك ... بلاش هبقى أفتح علبة فول و خلاص
أحمـد - طيب لو عايزه ساندوتش ادينى رنه و أنا اعملك سندوتشات فول أحسن منهم
ماما - اعملهالى توست

بتحبني - فحته رقم 1

المكان: عند آخر مطب في سندوب - قبل المنصورة بشوية
الزمان: 8 نوفمبر, 2009
المناسبة: راجعين من الجامعة
الفحته:
- عصام: والناس اللي عندهم محل حلويات دول تدخل عليهم بإيه؟
- سمير: مش عارف. تيجيب بقى حلويات من مكان تاني هما أكيد مش بياكلوا من الحلويات بتاعتهم
- عصام: أو ممكن تيجيب فراخ وانت رايح وتقعدوا تجروا وراها. على الأقل تتسلوا بدل مانتوا قاعدين كده
- سمير: آه ممكن نقعد ننتف ريشها. بتحبني, مابتحبيكااااااك

تعريف الفحته

تعريف الفحته :
الفحته هو كل ما يقال بقصد الإضحاك ولكن بدون ضحك !
ويمكن إطلاقها على النكت السخيفة اللتى لا تملك سوى الإبتسام من فرط سخافتها
لكن الفرق الوحيد بين النكته السخيفة والفحته هو ان الفحته تلقائية ووليدة اللحظة ويتم إطلاقها لتتناسب مع شىء قاله شخص آخر
مثال१
حسن : كده انت بقى معادش ليك حجه
حسين : ولا حتى عمره؟
لماذا تم تسمية الفحته بهذا الإسم :
لأن وقعها على الشخص المفحوت هو نفس إحساسه بأن شخص قد ألقى عليه بكميه كبيره من التراب فى وجهه !
مرادفات الفحته :
الفحتجى أو الفحيت : هو الشخص المحترف فحتات
المفحوت : الضحية

يتبع :)

أهلا بك في فحته :)

الفحتة دايما تافهة, غلسة, لكن مفاجئة. دايما مش حلوة, بس مش وحشة.
الفحتة مش قليلة الأدب ومش دمها خفيف.
الفحتة دي حاجة بنعملها كلنا واحنا مش عارفين. هو يعني إيه فحته؟